Новы замак. Літаратурны альманах. Выпуск 8
Галоўны рэдактар: Янка Трацяк.
Загаловак: «Новы замак. Літаратурны альманах. Выпуск 8».
Вокладка: мяккая.
Колькасць старонак: 288.
Анатацыя
Чарговы выпуск літаратурнага альманаха “Новы замак” пад адной вокладкай змяшчае творы больш трох дзясяткаў аўтараў, сяброў гродзенскага абласнога аддзялення грамадскага аб’яднання “Саюз беларускіх пісьменнікаў”. Тэксты прадстаўленыя ў 11 рубрыках. Таксама альманах змяшчае звесткі пра кнігі, выдадзеныя ў 2018-2019 гадах сябрамі гродзенскага аддзялення СПБ і падае хроніку яго дзейнасці за 2019 год.
Ад рэдакцыі
Чарговы нумар альманаха «Новы Замак» працягвае лепшыя літаратурныя традыцыі рэгіёна. І надалей асновай альманаху застаецца мастацкае слова вядомых пісьменнікаў Панямоння, увасобленае ў паэзіі (Святлана Абдулаева, Рычард Бялячыц, Анатоль Брусевіч, Уладзімір Васько, Юрка Голуб, Мікола Канановіч, Мечыслаў Курыловіч, Галіна Самойла) і прозе (Валянцін Дубатоўка, Віктар Варанец, Міхась Зізюк, Ала Нікіфорская, Ала Петрушкевіч, Аляксей Пяткевіч, Віктар Сазонаў, Уладзімір Хільмановіч, Сяргей Чыгрын, Леанарда Юргілевіч і інш.).
Разам з тым чытачу прапануюцца і цалкам новыя рубрыкі. Так, рубрыка «Напачатку было Слова…» (Ян. 1:1–14) прадыктавана вострай патрэбай часу звярнуцца да вечных пытанняў адносна шматзначнасці і шматасацыятыўнасці паняцця «Слова» (Слова як касмічны Логас, Слова-творца, Слова як праява вышэйшага розуму, дзякуючы якому адбываецца ўдасканальванне сусвету і чалавека). Якім было Слова? Якім Яно стала? Якім Яно можа стаць? Якім Яно павінна быць? Дадзеную старонку «Новага Замка» адкрывае Анатоль Брусевіч фрагментам з рамана-пропаведзі «Пакаранне», дзе філасофія паэзіі змяшалася з паэзіяй філасофіі, і які несумненна прыцягне сваёй глыбінёй і нетрывіяльнай сутнасцю ўвагу самага пераборлівага чытача.
А магчыма, і ўразіць. Дарэчы, мы прывыклі ўспрымаць літаратуру паводле крытэрыяў «спадабалася» альбо «не спадабалася», а сапраўднае вербальнае мастацтва павінна менавіта ўражваць. У далейшым рэдакцыя альманаха будзе толькі вітаць мастацкія інтэрпрэтацыі адзначанай тэматыкі.
У гэтым нумары адкрываюцца і яшчэ дзве новыя старонкі: «Гасцёўня «Новага Замка», куды ўпершыню запрошаны ўдзельнікі Паэтычнага салона г. Шчучына, і рубрыка «Дэбют», у якой альманах пазнаёміць чытачоў з сябрамі моладзевага літаратурнага клуба «Катарсіс» г. Гродна.
Наймалодшым чытачам альманах прапануе дзіцячую п’есу Сяргея Чыгрына «Зайкаў скарб» (рубрыка «Драматургія»).
Крыху змянілася і структура зместу альманаха. Тэксты, якім уласцівы адзіны крытэрый, а менавіта: не выдуманыя, а рэальныя героі і персанажы, рэальныя падзеі і з’явы (дакументальныя і навукова-папулярныя артыкулы, нон-фікшн, публіцыстыка, эсэ) будуць аб’яднаныя пад адной рубрыкай «Дакументальная проза». На гэты раз тэматыка рубрыкі аказалася вельмі багатай і разнастайнай.
Янка Трацяк
